फेसबुकमा पछ्याउनुहोस्
काठमाडौँ । स्वास्थ्य तथा जनसङ्ख्या मन्त्रालयकी अतिरिक्त सचिव डा. संगीता कौशल मिश्राले आफूलाई सचिव नबनाइएको भन्दै सर्वोच्चमा रिट दायर गरेकी छिन् । उनले सरकारविरुद्ध सर्वोच्च अदालतमा उनले दायर गरेको रिटलाई लिएर न्यायाधीश बालकृष्ण ढकालको एकल इजलासले दुवै पक्षलाई छलफलका लागि बोलाएको छ ।
वरिष्ठताको क्रममा अगाडि भएपनि आफूलाई स्वास्थ्य सचिव नियुक्त नगरिएको भन्दै मिश्राले चैत १ गते सर्वोच्चमा रिट निवेदन दिएकी थिइन् । उक्त विषयलाई लिएर सर्वोच्चले सरकारलाई कारण देखाउन समेत भनेको छ । रिटमा उनले प्रधानमन्त्री तथा मन्त्रिपरिषद् कार्यालयलाई विपक्षी बनाएकी छिन् ।
गत फागुन २१ मा बसेको मन्त्रिपरिषद् बैठकले अतिरिक्त सचिव डा. विकास देवकोटालाई सचिवमा बढुवा गर्ने निर्णय गरेको थियो । आफूलाई सचिव नबनाइएपछि डा मिश्राले स्वास्थ्य मन्त्री प्रदीप पौडेलको राजीनामा समेत माग गरेकी थिइन् ।
मन्त्रिपरिषद्मा लाेकसेवा आयोगले नयाँ सचिवका लागि मन्त्रालयका तीन अतिरिक्त सचिवहरू डा मिश्रा, डा विकास देवकोटा र डा टंक बाराकोटी सिफारिस गरेको थियो । असन्तुष्टि प्रकट गरेकी डा मिश्रा बिदामा बसेकी छिन् भने डा बाराकोटी स्वास्थ्य सेवा विभागको महानिर्देशक नियुक्त भएका छन् ।
