काठमाडौँ । काठमाडौँको टोखा नगरपालिकामा पर्ने झोरबाट ठूलो परिमाणको विदेशी मुद्रासहित गए राति एक जना ट्रक चालक पक्राउ परे । काठमाडौँ उपत्यका अपराध अनुसन्धान कार्यालयको टोलीले ना ७ ख १६५२ को ट्रक र त्यस ट्रकभित्र लुकाएर राखेको पैसासहित चालकलाई नियन्त्रणमा लिएको थियो ।
प्रहरीले मंगलबार दिउँसो पत्रकार सम्मेलन गरी ट्रक चालक र बरामद विदेशी मुद्राबारे अहिलेसम्म प्राप्त जानकारी भन्दै केही कुरा खुलाएको छ । प्रहरीका अनुसार ट्रक चालक सिन्धुपाल्चोकको भोटेकोशी गाउँपालिका वडा नम्बर १ का ४३ वर्षीय कुसाङ लामा (फुच्चे) हुन् ।
उनी केही समयदेखि काठमाडौँको गोकर्णेश्वर नगरपालिकास्थित गोकर्णमा डेरा गरी बस्दै आएका थिए । ट्रक उनको आमाको नाममा छ । उनले ट्रकमा विदेशी मुद्रा राख्नुअघि २० दिनदेखि रङ लगाउन ट्रक ग्यारेजमा राखेका थिए । लामा सुन तस्करी आरोपमा पाँच वर्ष जेल परेका थिए। जेलबाट छुटेपछि उनले ट्रक चलाउन थालेको देखिन्छ ।
चालक लामाले ट्रकमा कसरी लुकाएर ल्याएका थिए यति धेरै विदेशी मुद्रा ? प्रहरीका अनुसार ट्रकको क्याबिनमा फल्स बटम बनाएर त्यसमा पैसा लुकाएर राखिएको थियो । उनले यो विदेशी मुद्रा कहाँ लैजाँदै थिए? प्रहरीले चालक लामासँग यसबारे सोधपुछ गरेको छ । प्रहरीले दिएको जानकारी अनुसार प्रारम्भिक बयानका क्रममा चालक लामाले उक्त पैसा चीनको केरुङसम्म लैजान लागेको बयान दिएका छन् । तर चालक लामाले त्यस ट्रक रसुवागढीसम्म लगेर छाड्ने र रसुवाकै मानिस वा भिसाप्राप्त व्यक्तिको प्रयोग गरी त्यहाँबाट ट्रकलाई सीमा कटाएर केरुङसम्म पुर्याउने योजना बनाएको प्रहरी स्रोतको भनाइ छ ।
२५ करोड रकमसहित पक्राउ परेका ट्रक चालक कुसाङ लामा ।
चालक लामाले काठमाडौँको सामाखुसी क्षेत्रमा पार्किङ गरिराखेको आफ्नो ट्रकमा कसैले पैसा लोड गरिदिएको बयान दिएका छन् ।
तर यस घटनामा चालक लामाको मात्र नभएर अरूको पनि संलग्नता हुन सक्ने प्रहरीको अनुमान छ । प्रहरीलाई सोमबार अबेर राति ट्रकमा ठूलो रकम राखेर लैजाँदै गरेको सूचना आएको थियो । उक्त सूचनापछि डिएसपी अनिल घिमिरेसहितको टोली परिचालन भएको थियो ।
काठमाडौँ उपत्यका अपराध अनुसन्धान कार्यालय टेकुमा ट्रक ल्याएर पैसाको खोजी सुरु गरिएको ती अधिकृतले जानकारी दिए ।
२५ करोड रुपैयाँ बोकेको ट्रक ।
२५ करोडभन्दा बढी रकम ट्रकमा राखेर लामा केरुङतर्फ अघि बढ्दै गर्दा प्रहरी नियन्त्रणमा परेका थिए । लामा २०७३ सालमा ७ किलो सुनसहित पक्राउ परेर २०७८ सालमा छुटेका थिए । अहिले पनि उनले सुन तस्करीकै लागि उक्त रकम केरुङतर्फ लैजान लागेको प्रहरी स्रोतको भनाइ छ । उनले कसको पैसामा कसलाई सुन तस्करी गर्छन् भन्ने खुलेको छैन ।
प्रहरीले चालक लामालाई विदेशी विनिमय (नियमित गर्ने) ऐन २०१९ बमोजिम अनुसन्धान गर्न राजश्व अनुसन्धान विभाग हरिहर भवन ललितपुरलाई बुझाउने तयारी गरेको छ । प्रहरी र राजश्व अनुसन्धान टोलीले बरामद भएका विदेशी मुद्राको सिरियल नम्बर रेकर्ड राखेर अनुसन्धान थाल्नेछन् । यो पैसा विभिन्न कानुनी प्रक्रिया पूरा गरी सरकारी राजश्वमा दाखिला हुनेछ ।
बरामद भएको युरो नेपाली बजार मूल्यअनुसार २० करोड ७६ लाख ४७ हजार ६ सय ५० रुपैयाँ र अमेरिकी डलर नेपाली मूल्यअनुसार चार करोड ४२ लाख ७७ हजार ३ सय रुपैयाँ हुन आउँछ ।
