काठमाडौँ । नेपाल राष्ट्र बैंकमा नयाँ गभर्नर नियुक्ती गर्न उमेरहद हटाइएको छ ।
राष्ट्र बैंकको २३ गतेपछि रिक्त हुने गभर्नर पदका लागि ६५ वर्ष उमेर कटेका डा. रवीन्द्र पाण्डे र राजेन्द्र किशोर क्षेत्री प्रतिस्पर्धामा छन् । क्षेत्री २०१५ साल कात्तिक ८ गते जन्मिएका हुन् । उनी २०७४ कात्तिक ७ गते मुख्यसचिव पदबाट ५८ वर्षे उमेर हदका कारण अनिवार्य अवकाशमा गएका थिए ।
यस्तै पाण्डे सन् १९५५ मा जन्मेका हुन् । उनी ७ वर्ष राष्ट्र बैंकको कार्यकारी निर्देशकको रूपमा काम गरि १५ वर्षअघि अवकाश पाएका थिए । राष्ट्र बैंकका गभर्नर महाप्रसाद अधिकारीको समयावधि यही चैत २४ गते सकिँदै छ ।
गभर्नर सिफारिस गर्नका लागि अर्थमन्त्री विष्णुप्रसाद पौडेलको नेतृत्वमा तीन सदस्यीय समितिसमेत गठन भइसकेको छ । गभर्नर बन्न आधा दर्जन व्यक्ति दौडमा रहेका बेला सरकारले मापदण्ड नै परिवर्तन गरेको हो ।
अर्थ मन्त्रालयसम्बद्ध सार्वजनिक निकायका पदाधिकारी र सदस्य नियुक्तिसम्बन्धी मापदण्ड २०७३ मा संशोधन गरी उमेरको अधिकतम हदसम्बन्धी व्यवस्था नै हटाइएको छ । यसबाट ६५ वर्ष नाघेका जोसुकैलाई पनि राष्ट्र बैंकको गभर्नर बनाउने बाटो खुलेको छ । मापदण्डको दफा ३ को ‘ग’ मा उमेरसम्बन्धी व्यवस्था तोकिएको थियो । उक्त व्यवस्थाअनुसार मन्त्रालयअन्तर्गतका सार्वजनिक निकायमा कार्यकारी प्रमुख नियुक्तिका लागि ३० वर्ष उमेर पुगी ६५ वर्ष पूरा नभएको हुनुपर्ने व्यवस्था रहेको थियो । अहिले त्यो बुँदा नै हटाइएको छ ।
२०८१ साल फागुन २७ गते उक्त मापदण्ड नेपाल सरकारले स्वीकृत गरेको उल्लेख छ ।
