काठमाडौँ । सञ्चार तथा सूचना प्रविधिमन्त्री पृथ्वीसुब्बा गुरुङले प्रजातन्त्र जन्माउन रेडियो नेपालको भूमिका जति महत्त्वपूर्ण थियो अहिले मुलुकलाई राष्ट्रिय एकतामा आबद्धता गराउन उत्तीकै रेडियो नेपालको भूमिका अहम् हुने बताएका छन् ।
काठमाडौँमा आज सार्वजनिक सेवा प्रसारण रेडियो नेपालको ७५औँ वार्षिकोत्सव ‘हीरक महोत्सव’ कार्यक्रममा मन्त्री गुरुङले राजावादी समूहले गरेको हिंसात्मक प्रदर्शन सामन्ती प्रवृत्तिको रहेको बताए । यस्तो आचरणलाई हटाएर जनतालाई गणतन्त्रको महत्त्व दर्साउने र जनतामाझ सत्यतत्थ्य सूचना दिन रेडियो नेपाल लगायत सार्वजनिक सेवा प्रसारण संस्थानहरूको विशेष भूमिका हुने उल्लेख गरे ।
राजा ज्ञानेन्द्रले पार्टीहरूको अगाडी थाकेर जनतालाई सार्वभौम सत्ता सुम्पिएको इतिहास सम्झाउँदै अहिले फेरि हराइसकेको राजकीय सत्ता ल्याउन खोज्नु मूर्खतापूर्ण कार्य रहेको उनले प्रस्ट पारे । उनले भने, ‘गणतान्त्रिक शासन व्यवस्थामा राजा आऊ देश बचाउ भन्नु सज्जनहरूले गर्ने काम होइन ।’
नेपाल सरकारका प्रवक्ता समेत रहनुभएका मन्त्री गुरुङले सरकारको प्रशंसा भन्दा पनि जनतालाई सही सूचना प्रसारण गर्ने पिएसबीको प्रमुख दायित्व हुने बताए । रेडियो नेपाल प्रत्येक जनताको घर दैलोमा गुन्जिनु पर्ने र यसका लागि नेपालको माटो सुहाउँदो पिएसबी मोडलका कार्यक्रमहरू सञ्चालन गर्नुपर्ने सुझाव समेत उनले कार्यक्रममा राखेका थिए । ‘राष्ट्रिय एकता सिर्जना गर्ने माध्यम रेडियो नेपाल भएकाले सबै जनताको पहुँचमा पुर्याउन जरुरी छ’, उनले भने ।
त्यस्तै, सञ्चार सचिव राधिका अर्यालले रेडियो नेपालको गरिमामय इतिहास रहेको बताउँदै पिएसबीमा रूपान्तरण भएपछि यसले बहन गर्ने जिम्मेवारी जनताप्रति जबाफदेही हुनुपर्ने बताए ।
पिएसबीका कार्यकारी अध्यक्ष डा. महेन्द्र विष्टले आगामी दिनमा रेडियो नेपालको पहुँच शतप्रतिशत जनतामा पुर्याउने बताउँदै समावेशी चरित्रका कन्टेन निर्माणमा जोड दिइने प्रतिबद्धता व्यक्त गरे । कार्यक्रममा हुलाक सेवा विभागले रेडियो नेपालको हीरक जयन्ती सम्बन्धी पहिलो हुलाक टिकट आवरण प्रकाशन गरेको थियो । जसमा सञ्चारमन्त्री गुरुङले टिकट आवरणमा टाँचा प्रदान गरेका थिए ।
