|फाइल फोटो
काठमाडौँ । यो साता सुरुआतदेखि नै काठमाडौँ उपत्यकाको वायु प्रदूषण उच्च रहेको छ । प्रदूषण बढ्दा भिजिबिलिटी पनि घटेको छ । सोही कारण हवाई उडान पनि प्रभावित भइरहेका छन् । आइतबारदेखि अस्वस्थ कर भएको काठमाडौँको वायु गुणस्तर केही स्थानमा त खतराको तहमा पुगिसकेको छ ।
बुधबार बिहान काठमाडौँ विश्वको प्रदूषित सहरमध्ये दोस्रो स्थानमा रहे पनि वायुमण्डलमा खैरो धुवाँ उडेजस्तो देखिएको छ । ‘आज काठमाडौँ सबैभन्दा धेरै वायु प्रदूषण भएको सहरको दोस्रो स्थानमा पुगेको छ, तर वायु प्रदूषण घटेर होइन, दिल्लीको प्रदूषण बढेर। भोलिदेखि थोरै प्रदूषण घट्ने देखिए पनि अर्को सातादेखि वर्षाको सम्भावना छ र आँखा पोल्न छोड्ला’, मौसमविद् विनोद पोखरेलले ट्विटरमा लेखेका छन् ।
आईक्यूएयरको तथ्यांकअनुसार आज बिहान काठमाडौँको औसत एयर क्वालिटी इन्डेक्स (एक्युआई) रौँभन्दा तीन गुणा मसिना धुलो धुवाँका कण प्रतिघण्टा २६८ माइक्रोग्राम प्रतिघनमिटर मापन गरिएको छ । मंगलबार २२५ मापन भएको थियो ।
पहिलो स्थानमा रहेको दिल्लीमा बिहान ३३६ प्रतिघण्टा २६१ माइक्रोग्राम प्रतिघनमिटर मापन गरिएको छ । जबकि १०१ देखि १५० लाई नै संवेदनशील समूहका लागि अस्वस्थ मानिन्छ । १५१ देखि २०० सम्मलाई अस्वस्थ, २०१ देखि ३०० सम्मलाई निकै अस्वस्थ र ३०१ भन्दा माथि मापन भए खतरनाक तह पुगेको मानिन्छ यसअनुसार काठमाडौँ निकै अस्वस्थ कर तहमा छ भने दिल्ली खतराको तहमा पुगेको छ ।
